دھواں

ایک صدی پرانے گھر کے پچھلے صحن میں

چند کرسیاں اور میزیں سجی ہوئی ہیں

شہر کے ہنگاموں سے دور
فرصت کے لمحے ایکدوسرے کے ساتھ گزارنے کے لئے
چند لوگ یہاں موجود ہیں

وہ بھی ایک میز کے پیچھے رکھی کرسی پر
سیاہ لباس پہنے براجمان ہے
منہ میں سگریٹ دبائے
دائیں ہاتھ کا حلقہ بنا کر
بائیں ہاتھ سے لائٹر کا شعلہ بھڑکاتا ہے
اور اس کا سگریٹ اس کے سیاہ ہوتے ہونٹوں کے درمیان
دھیمے سے سلگنے لگتا ہے

اس کی آنکھوں میں بھرپور
اور ہونٹوں پر مدھم سی شریر مسکراہٹ کھیل رہی ہے
اس نے سگریٹ کو دو انگلیوں کے درمیان تھاما
اور اپنے ہونٹوں سے جدا کر دیا

دھواں اس کے منہ سے نکل کر ہوا میں تحلیل ہونے لگا
میں نے اسے دیکھا
دھواں چھوڑنے میں ایک حسن ہے
دلفریبی ہے
ایک نزاکت ہے

اسے دیکھنا بھی ایک لطیف احساس ہے
آہا! کیا دلکش نظارہ ہے
میرے بس میں نہیں کہ میں
ایک صدی پرانے گھر کے پچھلے صحن میں رکھی
کرسیوں اور میزوں پر
اس دھویں کو پھیلادوں

تا کہ میں جہاں بھی نظر دوڑاؤں
مجھے اس کے منہ سے نکلتے سگریٹ کے دھویں کی دھند میں
اپنے خدوخال دکھائی دیں
اور یہ دھواں باد نسیم بن جائے
لیکن یہ میرے بس میں نہیں!!!!