کرکٹ اور میرا تعلق تقریباً تیس سال پرانا ہے اور یہ تعلق ناموافق و نامناسب حالات، گھریلواور دیگرمسائل کے باوجود نہ ٹوٹ سکا۔ اللہ کے فضل و کرم سے اپنی زندگی کی چار دہائیاں مکمل کرچکا ہوں مگر کرکٹ سے تعلق میں کسی قسم کی تبدیلی نہیں آئی، جوش آج بھی کسی نوخیز بچے کی مانند ہے۔ یوں تو فٹبال، ہاکی، والی بال اور بیڈمنٹن میں بھی ہم نے اپنی صلاحیتوں کے جوہر دکھائے مگر کرکٹ سے تعلق اپنی جگہ قائم ودائم رہا اور الحمدوللہ ہے۔
کرکٹ سے متعلق اپنے تعلق کے حوالے سے ایک واقعہ رقم کررہا ہوں ‘یہ بات ہے 1987 کے ورلڈ کپ کی جس کا انعقاد پاکستان اور بھارت میں مشترکہ طور پر ہوا۔ اپنی نئی نسل کی آگاہی کے لئے یہ بتاتا چلوں کہ اس ورلڈکپ کے میچز صرف لاہور کے “قذافی اسٹیڈیم” یا کراچی کے “نیشنل اسٹیڈیم” میں نہیں کھیلے گئے تھے بلکہ ان بین الاقوامی میچوں کی میزبانی کے فرائض فیصل آباد کے “اقبال اسٹیڈیم”، پشاور کے “ارباب نیاز اسٹیڈیم”، راولپنڈی کے “پنڈی کلب اسٹیڈیم” گوجرانوالہ کہ “میونسپل اسٹیڈیم” اور حیدرآباد کے “نیاز اسٹیڈیم” نے دئے تھے۔ مختصراً یہ کہ پاکستان نے اپنے پول میں پہلی پوزیشن حاصل کرنے کیلئے چھ میں سے پانچ میچوں میں شاندار کامیابی حاصل کی اور اپنے راؤنڈ کا آخری مقابلہ ویسٹ انڈیز سے نہ جیت سکا۔ 4 نومبر 1987 کو سیمی فائنل لاہور میں منعقد ہوا اور اس معرکہ کیلئے مدِمقابل آسٹریلیا تھا۔ پاکستانی ٹیم کی بہترین کارگردگی نے پاکستانی قوم کی توقعات بھی آسمان پر پہنچا دیں تھیں، مگرساری توقعات پر اس وقت پانی پھرگیا جب ہمارے تمام بلے باز اٹھارہ رن پہلے ہی ہمت ہار گئے اور یہ وہ تاریخی اٹھارہ رن تھے جو سلیم جعفر نے آخری اوور میں دئیےتھے اور پاکستان کو شکست کا سامنا کرنا پڑا۔
لاہور کے قذافی اسٹیڈیم میں لگ بھگ ستاون ہزار (57000) تماشائیوں نے اس میچ کو دیکھا۔ اس دن کرکٹ کیلئے ہماری آنکھوں سے خوب پانی بہا یہ پہلی اور آخری دفعہ تھا جو ہم نے اپنے قیمتی آنسو اس کھیل کے تعلق میں بہائے پھر ہم نے کرکٹ کیا دنیا سے ہی توقعات چھوڑ دیں اور اس لفظ کو اپنی ڈکشنری سے ہمیشہ کیلئے نکال دیا۔
مذکورہ بالا تحریر سے میرا مقصد کرکٹ سے اپنی والہانہ تعلق کا اظہار قطعی نہیں تھا کیونکہ نامعلوم مجھ جیسے بلکہ مجھ سے کئی گنا زیادہ والہانہ پن کرکٹ سے رکھنے والے آج بھی موجود ہیں۔ اس تحریر سے ایک تو یہ پتہ چل رہا ہے کہ پاکستان کا کوئی ایک شہر کرکٹ کا دیوانوں کی آماجگاہ نہیں ہے بلکہ پورے کا پاکستان کے کونے کونے میں کرکٹ کے متوالے اور “محبت” کرنے والے بستے ہیں۔ پاکستان میں حالات کیسے بھی ہوں مگر کرکٹ کے متوالے اپنا شوق اور اپنی محبت کا رنگ دیکھاتے میدانوں، سڑکوں اور گلی محلوں میں نظر آتے ہیں۔ ہم پاکستانی لاکھ مختلف امور میں علاقائی، لسانی، سیاسی اور مذہبی اختلافات رکھتے ہوں مگر جب بات کرکٹ کی ہوتی ہے تو پاکستان ایک ہوتا ہے۔ خواتین پاکستان کی جیت کیلئے “سروں پر ڈوپٹہ” ڈال کر دعائیں کرتی بلکہ گڑگڑاتی نظر آتی ہیں۔ پاکستانیوں کو یا تو کوئی حادثہ یا سانحہ متحد کرسکتا ہے یا پھر تن تنہا کرکٹ کا کھیل۔ بصورتِ دیگر ہم ایک دوسرے کی مخالفت میں “صرف” ہونے والے کو ہی قیمتی سمجھتے ہیں۔
پاکستان سپر لیگ کی انتظامیہ نے پہلے ایڈیشن کے اختتام پر ہی یہ پیغام چھوڑ دیا تھا کہ اگلے یعنی دوسرے ایڈیشن کا کم از کم فائنل پاکستان میں ضرور کروائیں گے۔ دوسرے ایڈیشن کی افتتاحی تقریب میں اس بات کی توثیق کردی گئی کہ فائنل قذافی اسٹیڈیم، لاہور پاکستان میں کھیلا جائے گا۔ فروری کی 9 تاریخ کو پاکستان سپرلیگ کی رنگا رنگ اور پر وقار افتتاحی تقریب دبئی کے اسپورٹس سٹی اسٹیڈیم میں منعقد ہوئی اور اس کے بعد سے مقابلوں کا سلسلہ شروع ہوگیا۔ان مقابلوں کو دبئی اور شارجہ میں مقیم پاکستانیوں نے بھرپور کامیاب بنایا، کھیل اور کھلاڑیوں کو بھرپور دادوتحسین سے نوازا اور ماحول کو گرمائے رکھا۔
دوسری طرف انتظامیہ نے اپنی کوششوں کا رخ موڑا اور فائنل کو لاہور کے قذافی اسٹیڈیم لے جانے کی تیاریاں شروع کردیں۔ ہمارے دشمنوں کے کان کھڑے ہوئے، ہماری سلامتی کے دشمنوں نے جو اب تک یہ سمجھ رہے تھے کہ یہ سب باتوں اور لفظوں میں چل رہا ہے، انک ا سوچنا ایسا ہوگا کہ یہ تو ممکن ہو ہی نہیں سکتا، وہ چوکنے ہونا شروع ہوئے اور جب انہیں یہ یقین ہوگیا کہ یہ کرکٹ کے متوالے کرکٹ کے لئے پاگل لوگ اب فائنل پاکستان کے دل لاہور میں کروا کر ہی دم لیں گے تو انہوں نے اپنے ناپاک اورخونی عزائم کی بدولت معصوم لوگوں کی زندگیوں سے کھیلنا شروع کردیا۔
اس گھناؤنے کھیل کا آغاز لاہورشہر سے کیا گیا کہ حکومت اس فائنل کو لاہور میں کرانے کو منع کردے یا انتظامیہ اپنا ارادہ بدل لے مگر ایسا کچھ بھی ہوتا نہیں دکھائی دیا تو ہمارے بزدل دشمن نےان دھماکوں کا سلسلہ دراز کردیا، لاہور کے بعد چارسدہ اور پھر ہمارے امن کے دشمن اس خونی کھیل کو ہیبت ناک حد تک لےگئے جب سندھ کے جنوبی شہر سیہون میں موجود صوفی بزرگ ولی اللہ حضرت لعل شہباز قلندر کی مزار میں زائرین کے حجمِ غفیر میں خود کش بمبار کی مدد سے خون کی حولی کھیلی۔ اس کے بعد کئی معتبر شخصیات اور حلقوں کی جانب سے حفاظتی امور کو لے کرفائنل لاہور میں نہ کرانے کا مشورہ دیا اورخدشہ ظاہر کیا یہ کسی بہت بڑے سانحے کا سبب نا بن جائے۔
زمینی حقائق کو مد نظر رکھیں تو بالکل ایسا ہی کرنا چاہئے تھا مگر پھر حکومت وقت نے یہ معاملہ اپنے ہاتھ میں لے لیا اور حتمی طور پر یہ فیصلہ کیا گیا کہ پاکستان سپر لیگ ایڈیشن 2 کا فائنل قذافی اسٹیڈیم لاہور میں ہی کھیلا جائے گا، پاکستان کی افواج ایک بار پھر میدان میں کود پڑیں اور امیرِ سپاہ نے ساری حفاظتی ذمہ داری اپنے اور اپنے جوانوں کے کاندھوں پر اٹھالی۔
یہ فائنل آج کھیلا جانا ہے۔ کوئٹہ گلیڈئٹر کی ٹیم پہلے ہی اپنی جگہ پکی کر چکی ہے جبکہ دوسری ٹیم پشاور زلمی ان کے مدمقابل میدان میں اترے گی۔ پاکستان سپر لیگ ایڈیشن 2 کا فاتح کوئی بھی ہو جیت پاکستان کی ہی ہوگی۔ قانون نافذ کرنے والے ادارے اور انتظامیہ جس طرح کہ فول پروف انتظامات کی یقین دہانی کروا رہے ہیں، انشاءاللہ فائنل خیر و عافیت سے ہوجائے گا۔
ہم پاکستانی نڈر اور بہادر قوم ہیں، ہم بڑے سے بڑے معاملے کو بہت بردباری، ہمت اور حوصلے سے سہہ جاتے ہیں۔ ہم نے کرپٹ حکمرانوں کو بھی جھیلا ہے اور ہمارے جوانوں نے جسم سے بم باندھ کر بھی وطن عزیز کی حفاظت کی ہے ہم نے کبھی کسی مشکل وقت میں اپنے ہم وطنوں کو تنہا نہیں چھوڑا لیکن وہ لوگ جو جہاں دیدہ ہیں جن کی نظر ہر لمحہ بدلتی صورتحال پر ہے جو کہیں سے بھی بیٹھ کر کہیں کا بھی معائنہ کرنے کی قابلیت اور اہلیت رکھتے ہیں ان کی ذمہ داری ہے کہ قوم کو جوش کی وجہ سے کسی مشکل میں نا دھکیلیں۔ ہمارا دشمن ہماری صفوں میں ہم جیسا ہی بن کرگھسا بیٹھا ہے ہمارے لئے شناخت کرنا بہت مشکل ہوتا جا رہا ہے۔ ہمارے اداروں کو بھٹکانے کی کوششیں کی جارہی ہیں۔ ہم پاکستانیوں کے لئے یوں تو ہر لمحہ ہی خوفزدہ کئے رکھتا ہے مگر ہم نہ تو ڈرتے ہیں اور نہ کسی ڈر کی وجہ سے رکتے ہیں۔
اس مشکل وقت میں ہمیں اپنے اداروں کے ساتھ نہ صرف بھرپور تعاون کرنا ہے بلکہ ان کی آنکھیں، ان کے بازو اور کان بنے رہنا ہے تاکہ اس کٹھن وقت سے ہم سہل طریقے سے گزر جائیں اور دنیا کو حقیقی معنوں میں یہ پیغام پہنچ جائے کہ ہمارے امن کی فاختائیں کون اڑانے پر تلا ہے ۔ فائنل کا وقت جیسے جیسے قریب آرہا ہے ہمارے دل کی دھڑکنیں بڑھتی جا رہی ہیں اور دعاؤں کیلئے لب کشائی کئے جا رہے ہیں۔ اپنے اس عمل سے نا صرف کرکٹ کی تاریخ میں ایک انہونا فائنل کرانے جا رہے ہیں بلکہ دہشت گردوں کے بھی دانت کھٹے کرنے کا عندیہ دینے جا رہے ہیں۔ ہم اس فائنل کی بدولت بین الاقوامی کرکٹ پاکستان کے میدانوں میں لاسکیں یا نہ لاسکیں مگر اپنے دشمنوں کے منہ پر خاک ضرور مل دیں گے۔
ایک پاکستانی ہونے کہ ناطے ساری دنیا کیلئے پیغام ہے کہ اگر ہم دہشت گرد ہوتے یا دہشت گردوں کی پشت پناہی کرنے والے ہوتے تو اس طرح کرکٹ کیلئے ایک کھیل لئے سیسا پلائی ہوئی دیوار بن کرنا کھڑے ہوتے۔ اب یہ فائنل ہماری عزت اور بقاء کا معاملہ بن چکا ہے۔ ہم نے زمین پر اپنے انتظامات کر لئے ہیں اب ہم آسمانوں میں رہنے والی طاقت سے دعاگو ہیں کہ “اللہ تعالی عزت اور ذلت آپ کے ہی مرہونِ منت ہے، اے اللہ اے رب العزت ہمارے ساتھ ہم پاکستانیوں کے ساتھ عزت کا معاملہ فرمائیں” (آمین یا رب العلامین)۔
